سلطه الذره

وجبه غنيه بالعناصر الغذائيه و مشبعه لوحدها و لذيذه
السلطه
المطلوب (علبه ذره - علبه تونه - عصير ليمونه - زيتون اسود - 3ملاعق مايونيز - ملح و فلفل حسب الرغبه )
الطريقه نهرس التونه بالشوكه كويس و نحط عليها المايونيز و الذره ونقلب و نضيف الليمون و الملح و الفلفل
نقلب الخليط جيدا و نضيف قطع الزيتون ثم نحطها فى الثلاجه شويه
تجمل بقطع الخس و حبات الطماطم الصغيره و تقدم بارده و بالهنا و الشفا

ساندوتش اللحم البسيط

وجبه سريعه و ممكن تتحضر بسهوله فى اى وقت
الساندوتش
المطلوب (نص كيلو لحم مفروم - حبتين طماطم - كوب زبادى - زيت زيتون - ملح و فلفل و بهار - خس - خبز )
الطريقه نتبل اللحم بالملح و الفلفل و البهارات و نحطه شويه فى الثلاجه
نشكل اللحم اقراص و ندهن صينيه بزيت الزيتون و نرصها فيها و نرش على الوجه شويه زيت زيتون
ندخلها الفرن حتى تنضج
نفتح الخبز و نحط قرص اللحم و عليه الخس و الطماطم و معلقه زبادى
تقدم مع سلطه زبادى بالخيار و بالهنا و الشفا

بطاطس بالمسترده

نوع من المقبلات السريع السهل
البطاطس
المطلوب ( نص كيلو بطاطس - بقدونس - 3 فصوص ثوم - عصير ليمونه - زيت زيتون - بصله مفرومه - 3 ملاعق مسترده - ملح و فلفل - زيتون اخضر )
الطريقه نسلق البطاطس و نقشرها و نقطعها مكعبات صغيره
نخلط المكونات السابقه مع بعض جيدا الثوم و البصل و المسترده و عصير الليمونه و شويه زيت زيتون و البقدونس المقطع و الزيتون مع البطاطس و نملح بالملح و الفلفل
تدخل الثلاجه و عند التقديم نحط على الوش شرايح الطماطم و الخيار و تقدم مع التوست المحمص بالهنا و الشفا

ساندوتش الدجاج الخاص

لذيذ و سهل و الاطفال و الكبار بيحبوه جدا و ينفع غدا او عشا او فى رحله
ساندوتش الدجاج
المطلوب ( عدد 2 صدر دجاجه مسلوق - خيار مخلل - 2 حبه طماطم - خس - مايونيز - جبنه شيدر - بصل - عيش كايزر )
الطريقه نضع شويه زيت زيتون فى مقلايه و نشوح البصله المقطعه و لما لونها يصفر نضيف صدور الفراخ المقطعه - و نملحها بالملح و الفلفل و نتركها 10 دقايق على النار و بعدين نطفى
نخلط عليهم المايونيز و نقلب كويس
نفتح العيش و نضيف ملعتين من خلطه الفراخ ثم فوقها شريحه جبنه شيدر و المخلل و الخس و شريحه طماطم على الوش و نغطى الساندوتش و يقدم بالهنا و الشفا

سلطه البطاطس

نوع من البطاطس سهل و سريع و طعمه حلو و يمكن ان تكون نوع من المقبلات الشهيه
سلطه البطاطس
المطلوب ( كيلو بطاطس - 2 حبه طماطم - 2 حبه فلفل اخضر - بصله متوسطه - بقدونس - معلقتين مايونيز - معلقتين مسترده - ملح و فلفل )
الطريفه نسلق البطاطس و نقشرها و نقطعها صغير نضع المايونيز و المسترده على البطاطس و نقلبهم تم نملح المقدار بالملح و الفلفل
نقطع الطماطم و الفلفل و البقدونس و البصل قطع صغيره و نضعهم على البطاطس و نقلبهم جيدا
تقدم مع التوست المحمص و بالهنا و الشفا

اومليت لذيذ

نوع من الاومليت لذيذ و غنى بالعديد من العناصر الغذائيه
الاومليت
المطلوب (5 بيضات -نص كوب لبن - حبه طماطم - فلفله خضراء - نص كوب فطر - بصله - جبنه شيدر - سمن او زيت زيتون - ملح و فلفل )
الطريقه يخفق البيض جيدا و يقلب على اللبن
يقطع الطماطم و الفلفل و الفطر و البصل و الجبن و يقلب الجميع معا كويس و يتبل
يضاف الخليط على البيض المخفوق باللبن
نضع السمن فى المقلاه و نصب الخليط السابق عليها مع تحريك الجوانب على خفيف
لما يستوى الطبقه السفليه نقلب القرص بحرص حتى يستوى من الجهه الاخرى
يقدم ساخن و بالهنا و الشفا

دجاج مشوى بسيط

طريقه سهله و سريعه و طعمها حلو
الدجاج المشوى
المطلوب (دجاجه مقطعه - معلقتين صلصه - 3 معالق زيت زيتون - شويه زعتر و روز مارى - عصير ليمونه - ملح و فلفل و بهارات )
الطريقه تقلب المكونات السابقه على بعض و نمزجهم كويس
نتبل الدجاج بالخلطه كويس و نتركهم فى الثلاجه 3 ساعات عشان تتشرب التتبيله
نرص القطع فى صينيه و عليها باقى التتبيله و ندخلها الفرن لحد ما تستوى و تتحمر كويس
تقدم مع مكرونه اسباجيتى و سلطه خضراء و بالهنا و الشفا

اللحم المشوى

طريقه جديده لطهى اللحم و الكل بيحب التجديد منعا للملل و خصوصا عشان الاطفال يقبلوا على الاكل المغذى
اللحم المشوى
المطلوب (كيلو لحم ضان او كندوز و يستحسن بتلو عشان يستوى بسرعه - فلفل اخضر مقطع - بصله مقطعه كبير )
للتتبيله (بصله - طماطم -3 معالق زيت زيتون - فص ثوم - ربع كوب لبن - عصير ليمونه - معلقتين خل - ملح و فلفل و بهارات )
الطريقه سهله جدا نفرم مكونات التتبيله معا فى الخلاط حتى تصبح خليط متجانس
نتبل اللحم بالخليط السابق جيدا و نتركه فى الثلاجه 3 ساعات حتى تتشرب التتبيله
نرص اللحم فى الصينييه و نحط عليه قطع الفلفل الاخضر و البصل المقطع و نغطى الصينيه بورق فويل و ندخلها الفرن لمده ساعه حتى تنضج و بعدين نشيل الورق و نسيبها تحت الشوايه حتى تتحمر كويس
تقدم مع سلطه زبادى و خبز او ارز ابيض و بالهنا و الشفا

الشيش طاووك

تجديد لصوره الفراخ التقليديه و بيكون ساندوتشات لذيذه جدا تنفع فى اى مناسبه او رحله و يستحسن نجهزه قبلها بيوم
الشيش طاووك
المطلوب (عدد 2 صدور فراخ - بصله مقطعه - حبه طماطم مقطعه - حبه فلفل اخضر مقطعه)
للصوص ( كزبره - بقدونس - معلقتين صويا صوص - عصير ليمونه - معلقتين خل - معلقتين زيت زيتون- ملح و فلفل )
الطريقه نجهز الصوص بخلط الكزببره و البقدونس و الخل و الليمون و الصويا و الزيت و الملح و الفلفل و نضربهم فى الخلاط حتى يصير مخلوط متجانس
نقطع الدجاج مكعبات و نتبلها بالخليط السابق و نتركها فى الثلاجه ليله كامله
نضع قطع اللحم فى اعواد و بين كل قطعه بصل و طماطم و فلفل ( قطعه لحم ثم قطعه بصل ثم قطعه طماطم ثم قطعه فلفل و بعدين قطعه لحم تانى و هكذا حتى تخلص الكميه )
نرص الاعواد فى صينيه و نصب عليها باقى الصوص المتبقى و ندخلها الفرن لحد ما تستوى و تتحمر كويس
تقدم مع خبز و سلطه طحينه و سلطه خضراء و بالهنا و الشفا

مكرونه بالفراخ حلوه جدا

صينيه لذيذه و مغذيه و كمان تجديد عن الاكل المعتاد
المكرونه بالفراخ
المطلوب ( كيلو مكرونه حجمها كبير - دجاجه متوسطه الحجم او صدور دجاج - بصله مقطعه - معلقتين سمن او زيت زيتون - ملح و فلفل و بهارات - ربع كيلو جبن موتزاريلا او رومى مبشور - بشاميل ( للبشاميل نحضر 3 معالق سمن -5معالق دقيق 3 اكواب لبن ) ممكن ربع كيلو بسله و جزر حسب الرغبه )
الطريقه نسلق الفرخه و نخليها و نقطعها ثم نشوح قطع الفراخ فى السمن و نحط عليها الخضار و نملحهم و تنتركهم شويه
نجهز البشاميل كالاتى نحمر الدقيق فى السمن و نضيف عليه اللبن ساخن لمنع التكتل و نملح بالملح و الفلفل و ممكن نزود كميه اللبن او نقللها حسب الرغبه تبعا لسمك الصوص ( البشاميل )
نقلب الفراخ على نص كميه البشاميل على المكرونه المسلوقه و نص كميه الجبنه و نخلطهم كويس ثم نضعه فى صينيه و على الوش باقى البشاميل و باقى الجبنه و تدخل الفرن لحد ماتتحمر من فوق و من تحت حوالى نص ساعه
بعد كده تقطع و تقدم مع سلطه خضراء و بالهنا و الشفا

الجبنه القريش

الجبنه القريش لذيذة و صحية لانها منزوعه الدسم و تعتبر مثاليه للريجيم
الجبنه القريش
المطلوب (5 كيلو لبن طازج )
الطريقه برضه سهله قوى ولا نضيف على اللبن شيئا و لكن بنرقد اللبن و ذلك كالتالى
بنحط اللبن فى وعاء من الاستانلس او الزجاج او اى مادة ما عدا الالومنيوم
بنغطيه و نحطه فى مكان مظلم و نتركه عشان يرقد يعنى يجمد و يتحول الى ذبادى بفعل البكتيريا النافعه و كمان يخرج الدهون و الدسم الى موجود فيه على هيئه القشطه الى هتطلع على الوش العمليه دى تستغرق يومين او تلاته فى الشتا و يوم واحد فى الصيف
لما نلاقى اللبن جمد و معدش سائل ناخد الوش ( القشطه ) و نحتفظ به وده له استخدامات كثيره هنتكلم فيها مره تانيه
اللبن المتبقى ممكن دلوقت يتاكل كذبادى او يخلط فى الخلاط مع الفواكه الاطفال بتحبه قوى
نرجع بقه للجبنه القريش اللبن الى شيلنا منه القشطه بنملحه حسب الرغبه و عاده القريش بيكون ملحها قليل او من غير ملح
بنحضر الشاشه و المصفى و نصب فيها اللبن و نغلى شويه ماء حوالى لتر و نصبها على اللبن و نقفل الشاشه و نغطى على المصفى بغطى تقيل عشان الماء و الشرشه ينزلوا و يفضل الجبنه ناشفه
بعد كده بنقطع الجبنه و تتحفظ فى الثلاجه
لما بينحط عليها زيت زيتون و طماطم و بقدونس بتكون لذيذه قوى و سحور شهى و خفيف و بالهنا و الشفا

الجبنه البيضاء

الجبنه البيضاء من الاساسيات فى كل بيت و لاغنى عنها
انا اول ما اتجوزت لقيت والده زوجى متعوده تعمل الجبنه فى البيت و تخزنها للسنه كلها و لما تذوقتها لقيت طعمها رائع و لايقارن بجبنه السوق
و لما اتعلمت الطريقه منها لقيتها سهله قوى و هكتبها دلوقت للى يحب يجرب مش الجبنه البيضاء بس ده كمان القريش و الذبادى و السمن البلدى كل مره هكتب حاجه و ابقوا ادعوا لحماتى
الجبنه البيضاء
المعيار الثابت فى الجبنه الدوبل كريم دائما لكل 10 كيلو لبن كيلو واحد ملح عشان تتحفظ لانها بتتخزن فتره طويله
المطلوب (5 كيلو لبن حليب - نص كيلو ملح - تلات ملاعق اكل منفحه)
الطريقه ندوب الملح فى اللبن كويس و نسخن اللبن على النار لحد ما نستحمله على ايدينا يعنى منغليهوش يسخن بس
وبعدين نحط المنفحه (المنفحه بتتشرى من عند العطار او الى بيبيع حاجات الجبنه ) و نقلب كويس
و نغطى اللبن و بسيبه شويه لحد ما يتجبن
بعد حوالى خمس ساعات هنلاقى اللبن بقى قرص
بنحضر شاشه و نبطن بيها مكبس الجبنه او اى مصفى و نغرف فيها الجبنه و نغطى بالشاشه و نحط غطا عشان الجبنه تخرج الماء الى فى اللبن و تجمد
الماء المستخرج منها بيكون الشرشه الى هنحفظ فبها الجبنه يعنى لازم نحط حله تحت المكبس او المصفى عشان ناخد الشرشه
نسيبها طول الليل و الصبح نفتحها هنلاقى قالب جبنه جميل تقطعه خرط و نحفظها فى الشرشه
دى طريقه الجبنه الدوبل كريم و على فكره عشان تبقى جبنه مظبوطه لازم نحفظها فى برطمان او صفيحه تلات شهور على الاقل عشان طعمها يبان و بالهنا و الشفا

المحوجة

السلام عليكم
من كام يوم كده ابنى جرب المحوجه عند جدته و عجبته جدا لانه اول مره يجربها و طبعا بصفتى امه و لازم اكون عارفه كل حاجه صممت اعملها له فى البيت على العموم هى بتتباع فى محلات الحلويات و المخبوزات و لكن انا بحب اجرب كل حاجه بنفسى لان الحاجه فى البيت بتبقى اوفر و اضمن و لو فشلت لا قدر الله يبقى نخلص منها من بره بره و نشترى و خلاص ههههه
و عنها و مكدبتش خبر سالت والدتى عن المقادير و الطريقه و استعنت على الشقه بالله
المحوجه
المقادير (كيلو دقيق-نص كيلو سكر- نص كيلو زيت -نص باكو بودر-حوالى 7 ملاعق كبيره(معلقه الاكل) تحويجه حوالى 125جرام -سمسم)
الطريقه (على فكره هى سهله جدا اول حاجه نحط الدقيق على البودر وبعدين السكر ثم التحويجه و دى على فكره بتتشرى من السوبر ماركت او من عند العطار و بعدين نحط السمسم و نخلى شويه للوش و نقلب كل المقادير الناشفه على بعض ثم نضع الزيت و نعجن كويس و ممكن نستعمل السمنه حسب الرغبه
هتتكون عجينه ناشفه شويه ندهن صينيه واسعه زيت او نقسم المقدار على صينيتين عشان المفروض متكونش سميكه و تضع العجين فيها و نبططه كويس قوى لحد ماتنفرد و تكون كلها فى مستوى واحد ثم نرش السمسم على الوجه و نثبته باليد و بعدين نقطعها بالسكين و ندخلها الفرن على فكره هى ما بتغبش فى الفرن اول ما تلاحظى احمرار الجوانب يبقى خلاص ولونها مبيتغيرش من فوق زى الغريبه كده
تترك فى الصينيه شويه عشان بتكون لسه طريه و بعد شويه بتشد و تنشف فتنقل من الصينيه و ان شاء الله تعجبكم)
السلام عليكم و رحمه الله و بركاته

الويكه

هي الباميه الكبيره و بتتعمل نى فى نى
الويكه
المطلوب ( كيلو باميه كبيره - بصله - صلصه - 4 فصوص ثوم - فلفل اخضر او احمر )
الطريقه نجهز الباميه و نغسلها و نقطعها و نقطع عليها الفلفل و نحط البصل المقطع و الثوم و الملح و الفلفل
نزود الصلصه و نحط الجميع على النار مع اضافه الشوربه و حته سمن و ممكن نزود حته لحمه مسلوقه و نتركها تستوى و تقدم بالهنا و الشفا
تعديل من مدام وفاء الله يباركلها
نحط طماطم بدل الصاصه و بعد ما بذور الباميه تحمر نهرسها و بعدين نجهز ثوم مقطع مع رشه كسبره ناشفه و نحمرهم فى السمن و بعدين نحطهم على الباميه زى الملوخيه يعنى
شكرا مدام وفاء معلوماتك ريحتها حلوه قوى

كفته الرز

هى الكفته ام صلصه و بتكون لذيذه قوى
الكفته
المطلوب (كيلو لحم مفروم - نص كيلو رز ابيض مطحون - شبت - كسبره - بقدونس -ثوم - بصل - توابل)
الطريقه نفرم المكونات السابقه مع بعض كويس جدا و تتعجن قوى عشان المكونات تدخل فى بعضها كويس و الكفته متفكش
نملح العجينه بالملح و الفلفل و شطه
نصبع الكفته صوابع رفيعه نوعا عشان لسه هتكبر لما الرز يستوى و بعدين نحمرها فى الزيت او السمن
نحضر الصلصه بنقطع فصين ثوم و نحمرهم فى السمن و نضيف الصلصه و الماء او الشوربه ان وجد و لازم ناخد بالنا ان كميه الميه تكون كافيه على قد الكفته مش قليله و نحط شويه ملح
لما تغلى نبدا نسقط الكفته فيها و نسيبها تستوى
لما الكفته تستوى و الصلصه تتقل تقدم بالهنا و الشفا
ممكن نستخدم جمبرى مفروم بدل اللحم و نزود الكمون و الكسبره الناشفه و الباقى زى ما هو و بنفس الطريقه و تسمى كفته الجمبرى

الكرشه و الفته

هى بتكون لونها ابيض بعد التنضيف و شبه الفوطه شويه و بتيجى برضه متنظفه
الكرشه
تتقطع قطع صغيره و تتغسل كويس ممكن تتعمل بنفس طريقه الكوارع
و فى طريقه تانيه و هى
نقطع شويه ثوم و نحمرهم فى السمن و نضيف الصلصه و شويه ميه
لما الصلصه تتسبك نحط قطع الكرشه و بعدين الماء و نسيبهم على النار لحد ما تستوى كويس و تتقدم مع رز ابيض بالهنا و الشفا
الفته
مع الكوارع و الكرشه يفضل تقديم الفته و هى سهله
بنحمر شويه عيش مقطعين فى الفرن (بنقطع العيش و نحط على شويه سمن او زيت صغيرين فى صينيه و ندخلهم الفرن لحد ما يتحمصوا )
بعد كده نحضر قارب التقديم و نرص عليه طبقه عيش و فوقها طبقه ارز ثم شويه شوربه (من شوربه الكوارع ام خل و ثوم )و هكذا طبقات لحد ما نخلص الكميه و على الوش نحط شويه صلصه من الكرشه ثم نرص قطع الكوارع على وش الفته مع قطع الكرشه و ابالهنا و الشفا
ممكن الفته تتعمل بنفس الطريقه مع قطع اللحم العادى

الكوارع

هى عباره عن الرجلين و بتيجى متنضفه من عند الجزار و متقطعه لان تقطيعها صعب
الكوارع
تغسل جيدا و توضع فى الماء على النار و لما تغلى نصفيها و نرمى الميه عشان تاخد معاها اى ريحه بعد كده نشوح الكوارع فى السمن و نزود الماء و الحبهان
نقطع بصله و نتبلها بالملح و الفلفل و نحطها على الكوارع
لما تستوى كويس نقطع فصين ثوم و نحمرهم فى السمن و نضيف رشه خل و نضيفهم على الكوارع و بالهنا و الشفا

الفشه و الطحال

الفشه هى الرئتين و هى عباره عن نسيج اسفنجى يعنى مينفعش نقطعه و هو نىء و كذلك الطحال كمان يعنى لازم يفضل على بعضه
الفشه و الطحال
الفشه و الطحال لهم نفس الطريقه لذلك هنتكلم على الفشه و الطحال بالمثل
نغسل الفشه كويس و نحطها فى الماء المغلى المملح و نسيبها لحد ما تستوى بعد كده نطلعها و نصفيها ثم نقطعها قطع صغيره و بعدين نبدا فى وضع النكهه لها
ممكن نحمرها فى السمن و نرش عليها ملح و فلفل
طريقه تانيه نقطع ثوم فى السمن و نشوح معها القطع
نفس الطريقه بس نقطع بصل بدل الثوم
تتقدم مع سلطه طحينه و بالهنا و الشفا

لحمه الراس

بتتعمل زى اللحمه العاديه يس بتكون مختلفه شويه فى الشكل و الرائحه
لحمه الراس
تتغسل كويس و نحطها فى حله مع شويه ماء على النار
لما الماء يغلى نصفى اللحمه منه و نرميه عشان ياخذ معاه اى ريحه غير مستحبه
نشوح اللحمه فى حته سمن و بعدين بغطيها بالماء و نملحها و نضيف معاها بصله سليمه وفص حبهان و نسيبها تستوى
لما تستوى نقطع فصين ثوم و نحمرهم فى السمن مع رشه خل و نضيفهم على اللحم و الشوربه و تقدم بالهنا و الشفا

الممبار

كتير من الناس بتحب الممبار و هو على فكره سهل مش صعب خالص
الممبار
المطلوب (كيلو ممبار- خلطه محشى )
الطريقه نغسل الممبار جيدامن الجهتين للتخلص من اى ماده لزجه فيه و ينقع فى الماء و الخل نص ساعه
نقطعه حسب الرغبه حسب الطول المطلوب
الخلطه المستخدمه فى المحشى هى نفس الخلطه فى الممبار
نحشى كل قطعه بالخلطه مع مراعاه انن نسيب حوالى نصها فاضى عشان لما الارز يستوى و يكبر يلاقى مكان و الممبار ما يتقطعش
نغلى حله ماء و متكونش حله صغيره عشان الممبار عايز مكان واسع
لما الماء يغلى نسقط الممبار قطعه قطعه و نضيف ملح و نص ليمونه
لما يستوى نطلعه من الماء و نحمره فى السمن و بالهنا و الشفا

المحشى

اكله مصريه جميله رغم انها بتاخد شويه وقت لكن الجميع بيحبها
سواء كان المحشى كرنب او ورق عنب او ورق خس او بازنجان او كوسه او طماطم او فلفل او غيرهااااااااااا
فالخلطه بتكون واحده
المحشى
المطلوب (بصلتين كبار -عصير طماطم (حوالى كيلو و نص طماطم ) او صلصه - كسبره و بقدونس و شبت -ربع كيلو ورق عنب - سمن - ملح و فلفل و بهارات)
الطريقه نقطع البصل و نحمره فى السمن
نضيف عصير الطماطم و الملح و الفلفل و البهارات و الشطه و الكركم و نسيبها تتسبك ممكن نضيف لحم مفروم او قطع لحم ضغيره جدا حسب الرغبه بعد كده نحط الخضره المقطعه (شبت و بقدونس و كسبره ) اخر حاجه قبل ما نطفى عشان تحتفظ بالنكهه و الرائحه
نضيف الرز المغسول حسب كميه الصلصه
و كده الخلطه جاهزه للحشو
ننظف الورق و نغلى ماء و نسلقه فيه سلق خفيف يا دوب يذبل
نبدا نلف المحشى بوضع قليل من الخلطه فى كل ورقه و لفها باحكام و نرص المحشى فى الحله لحد ما نخلص الكميه
نعصر ليمونه على الوش و نضيف الشوربه بس مش كتير يا دوب تغطى سطح المحشى على خفيف عشان ميكنش معجن ممكن نضيف على الوش قطع لحم مسلوق و نحط الحله على النار
لما تغلى و تبدا تتشرب الشوربه نوطى النار و نسيبها تستوى و بالهنا و الشفا

الرز المعمر

شهى و لذيذ جدا جدا و ممكن يتعمر بحاجات كتير لحمه او فراخ او حمام بس ايه بقى ده ما ينفعش للريجيم خالص المره دى هنعمله بالفراخ
المعمر
المطلوب (فرخه متوسطه الحجم - 4 كوب ارز - 3 كوب لبن - 3 كوب شوربه - سمن - نص كيلو قشطه )
الطريقه نسلق الفرخه بس من غير ما تستوى قوى
نغسل الرز و نحطه فى صينيه واسعه يكون الرز فى نصفها فقط لانه لسه هيرتفع
و نضيف عليه اللبن و الشوربه و الملح و الفلفل
نقطع الفرخه اربع و نغرس كل بربع فى الصينيه فى وسط الرز بعد كده نضيف حته سمن على الوش ثم نحط القشطه و ندخلها الفرن (لازم تكون الصينيه مش مليانه على الاخر عشان متفرش و تقع فى الفرن )
لما يبدا فى الغليان نغطيه و نوطى الفرن شويه و نتركه لحد ما يستوى (بعد شويه نبص عليه لو كان شرب السوائل و لسه الرز عايز ممكن نزود شويه لبن او شوربه حسب الحاجه لان فيه انواع رز بتحتاج سوائل اكتر من غيرها )
لما يستوى نرفع الغطا و نسيب الصينيه فى الفرن عشان الوش يتحمر و بعدين نطلعها
ممكن نقدم معاه سلطه عباره عن طماطم مقطعه مع رشه ثوم و زيت وملح بتكون رائعه معاه و بالهنا و الشفا

الطعميه

اكله مصريه شعبيه لاغنى عنها الكل بيحبها و يا سلااااااااااااااااام عليها لما تتعمل فى البيت بتبقى حاجه تانيه
ده غير انها مفيده جدا و فبها كل العناصر الغذائيه
الطعميه
المطلوب( كيلو فول مدشوش - بصلتين كبار - راس ثوم - كسبره و شبت و حبتين فلفل اخضر كبار - توابل )
الطريقه ننقع الفول فى الماء فتره كافيه عشان يكون طرى يفضل قبلها بليله
نقطع البصل و الثوم و الكسبره و الشبت و الفلفل و نحط عليهم الفول و نفرم الجميع كويس
العجينه الناتجه ممكن نكيسها و نحفظها فى الفريزر كل كيس حجمه على حسب الحاجه
دلوقت معانا عجينه الطعميه المطلوب تحضيرها عشان القلى
نملحها بالملح و الفلفل و الكسبره الناشفه و الكمون و الشطه و نحط عليها شويه كربونات صودا صغيرين جدا حسب كميه العجينه طبعا (لان المفروض اننا بنجهز حته عجينه بس للقلى مش كلها و الباقى محفوظ فى الفريزر من غير تجهيز )
و ممكن قوى نضيف عليها بيضه و نعجن كويس
بعد كده نشكلها اقراص و نحط عليها سمسم من الوجهين و نقليها فى الزيت و بالهنا و الشفه

صينيه الجمبرى

طبعا فيه طرق كتيير للجمبرى بس الصينيه دى خطيييييييييره
صينيه الجمبرى
المطلوب (كيلو جمبرى - طماطم - بصل - ربع كيلو طحينه - بقدونس )
الطريقه نحضر صينيه ونرص فيها حلقات البصل و الطماطم ونحط عليهم الجمبرى المتنظف طبعا و نتبل الجميع بالملح و الفلفل و الكمون والشطه و الكسبره الناشفه ونرش شويه بقدونس صغيرين
بعد كده نحضر الطحينه
نقشر ثومه و نهرسها و نحطها على الطحينه ونزود الماء و نعصر ليمونه ونقاب لحد ما نحصل على قوام الطحينه المناسب و نملحها
بعد كده نضيف الطحينه الى الصينيه و ندخلها الفرن
لما تستوى تتقدم مع رز ابيض او عيش و السلطه و بالهنا و الشفا

صينيه سمك بورى

معروف ان السمك البورى من اجمل الاسماك فى الطعم و له كذا طريقه فى التقديم سواء مشوى او مقلى او صينيه
صينيه السمك البورى
المطلوب ( كيلو بورى - بصل - طماطم )
الطريقه ينظف السمك و يتبل بالملح و الفلفل والكمون و الشطه و الليمون
نرص فى صينيه حلقات البصل و الطماطم و يرص فوقها السمك و نضيف شويه زيت صغيرين
يدخل الفرن لحد ما يستوى و يتحمر
يقدم مع رز ابيض او عيش و سلطه طحينه و سلطه خضرا و بالهنا و الشفا
ممكن اى نوع سمك تانى يتعمل بنفس الطريقه زى التونه مثلا

صينيه القراميط

نوع من انواع السمك و هو سهل و طعمه لذيذ
صينيه القراميط
المطلوب (كيلو قراميط - بصله -عصير طماطم او صلصه - نص كيلو بطاطس )
الطريقه سهله قوى بعد تنظيف السمك و تقطيعه باخذ القطع و نحمرها فى الزيت تحمير خفيف
نحضر الصلصه
نقطع البصله و نحمرها و نضيف لها عصير الطماطم و الملح و الفلفل و الكمون و الشطه لحد ما تتسبك ممكن نضيف حلقات بطاطس حسب الرغبه وممكن الاستغناء عنها
نرص قطع السمك فى الصينيه مع الصلصه و البطاطس و ندخلها الفرن
لما تحمر وتستوى تقدم مع رز ابيض و بالهنا و الشفا

سمك مقلى و رز احمر

اكله حلوه قوى و شهيه و مغذيه
السمك المقلى
المطلوب (كيلو سمك بلطى (شبار) كبير - ارز -بصلتين كبار - زيت للقلى -خلطه حشو السمك و هى (ثوم - طماطم - فلفل اخضر -بقدونس - ملح - كمون - شطه - ممكن اضافه او حذف اى مكون حسب الرغبه )
الطريقه من اسهل ما يكون ننظف السمك و نحشيه بالخلطه و بعدين نبطنه بالدقيق و نقليه فى الزيت و نطلعه على فرشه من البقدونس المقطع
اما بالنسبه للرز نغسله و نجهزه بالماء و الملح ثم نقطع البصلتين و نحمرهم فى اللزيت لحد ما يكون لونهم بنى
نضيف البصل على الرز و نقلبه و نحطه على النار لحد ما يغلى والماء يبدا ينشف نهدى النار و نسيبه يستوى و بعدين يقدم مع السمك و السلطه الخضرا و حلقات البصل و بالهنا والشفا

بيض اوملييت

البيض بيطلع منه اطباق كتيير قوى و كلها سهله و مغذيه و طعمها حلو
المره دى البيض اوملييت بس عليه اضافات تانيه هتخليه اطعم و افيد
البيض المحبش
المطلوب (اربع بيضات - فلفل اخضر - جبنه شيدر - قطعتين سوسيس)
الاول نضرب البيض مع شويه ملح و فلفل
و بعدين نقطع الفلفل الاخضر مكعبات و نقطع السوسيس حلقات و الجبنه مكعبات
نحط المقلايه على النار و فيها شويه زبده على زيت و المفروض ان المقلايه مبتلزقش و بعدين نحط فيها الفلفل الاخضر و الجبن و السوسيس و نقلب كويس لحد ما يتحمر الخليط و الجبنه تسيح
نصب البيض الضروب على الخليط و نسيبه لحد ما يستوى
نقدمه مع شويه بقدونس مقطع و حلقات طماطم و خيار و بالهنا و الشفا

صينيه ارنبيط حلوه قوى

الارنبيط من الخضراوات المفيده جدا سمعت دكتور مره فى التليفزيون بيقول ان الارنبيط فيه مواد بتساعد على التخلص من الالام الروماتيزميه
غير انه غنى بالمواد الغذائيه المطلوبه للجسم و بيكون لذيذ قوى لما بنقليه مع البيض و البقسماط او الدقيق
انا بعمله بالطريقه دى لكن من غير قلى و كده بيكون اصح و الطريقه سهله قوى
صينيه القرنبيط
المطلوب( تحضير قرنبيطه وسط - بيضتين او تلاته - بقسماط -زيت ذره او اى نوع )
اول حاجه نسلق قطع الارنبيط سلق بسيط يعنى يا دوب ينحط فى الماء المغلى شويه صغيرين عشان مش عايزينه يطرى و ينهرى
بعد كده نضرب البيض مع شويه ملح و فلفل
نصفى الارنبيط و نهرسه بالشوكه كويس و هو ساخن و نخلطه مع البيض و البقسمات و تقلب لحد الخليط ما يمتزج و نملحه حسب الرغبه
ندهن صينيه بالزيت كويس و نحط فيها الخليط و نصب على الوش شويه زيت صغيرين و ندخله الفرن لحد ما يتحمر من تحت ومن فوق
نطلع الصينيه و نقطعها و نقدم الخرط مع سلطه خضرا و عيش او نقدمها سندوتشات
ممكن قوى نحط مع الخليط السابق بطاطس مسلوقه و مهروسه مع شويه بقدونس و نخلطهم كويس و ندخلها الفرن برضه هتطلع حلوه قوى و بالهنا و الشفا

التورلى بتاعى

التورلى من الاكلات اللذيذه وانا بعمله بطريقه سهله قوى نى فى نى و اعتقد انها صحيه لانه زى ما احنا عارفين بيتكون من مجموعه من الخضار كمان المفروض نعود الاطفال عليه من صغرهم عشان يكبروا بيحبوا الخضار
التورلى
المطلوب (بطاطس - جزر -كوسه -فلفل اخضر -بسله -بروكلى او قرنبيط - بازنجان -بصل - ثوم- طماطم )
الطريقه بنقطع كل نوع حضار مكعبات ما عدا الطماطم بنعصرها و بنحط الخضار على بعضه فى صينيه و نسب الخضار لبعضه حسب الرغبه
بنقطع عليه البصل و الثوم و نتبل بالملح و الفلفل و البهارات و نضيف عصير الطماطم و نحط حته سمن او شويه زيت ذره او زيتون و نزودها بشويه شوربه او ماء و يا ريت لو نحط فيها كام حته لحمه (اللحمه بتكون مسلوقه مش نيه )
ندخلها الفرن لحد ما تستوى و تتقل و تتحمر
تطلع من الفرن و تتقدم مع رز ابيض و سلطه خضرا و بالهنا و الشفا

المكرونه باللبن

المكرونه باللبن تعتبر من الحلويات و مغذيه قوى لانها فيها مواد غذائيه مفيده زى اللبن و المكسرات و كمان تجديد عن الحلويات التقليديه
المكرونه باللبن
المطلوب ( نص كيلو مكرونه - كيلو لبن - -سكر -مكسرات او فول سودانى - جوز هند -زبيب-حوالى 3 معالق كبيره نشا -فانيليا -معلقه سمن او زبده )
الطريقه نسلق المكرونه فى الاول و نصفيها
نحلى اللبن بالسكر حسب الرغبه و نحطه على النار
نحل النشا فى شويه لبن و لما اللبن يقرب يغلى نحطه عليه و بعدين الفانيليا
لما يغلى اللبن بيكون تقل و لف زى المهلبيه كده بنصبه فوق المكرونه و نقلب كويس و نضيف جوز الهند و الزبيب و المكسرات و نقلب و نسيب شويه للوش
ندهن صينيه سمن و نصب المقدار فيها و على الوش شويه مكسرات او فول سودانى و نوزع معلقه السمن على الوش كله و ندخلها الفرن
لما تحمر من تحت و من فوق نطلعها و نستنى عليها شويه و بعد شويه نقطعها و تقدم خرط و بالهنا و الشفا

السجق بالخضار

الاكله دى ممكن تبقى غدا او عشا اوسندوتشات فى اى مناسبه
السجق بالخضار
المطلوب (نص كيلو سجق بلدى -فلفل اخضر -حبتين طماطم جامده - جزره مبشوره-حبه بطاطس مبشوره -بقدونس مقطع -بصله -توابل )
الطريقه سهله بنقطع البصله فوق السجق و بعدين نحط الجزر و البطاطس و نقطع الفلفل و نتبل الجميع بالملح و الفلفل و الكركم و الجنزبيل و نضيف شويه ماء و نحطهم على النار على فكره الملح و الفلفل بيكون مش كتير يعنى على قد الخضار بس لان السجق بيكون متبل جاهز يعنى مش محتاج
لما الخضار يستوى بيكون السجق استوى برضه بنزود الطماطم قبل ما نشيله من على النار بشويه صغيرين لان مش عايزينها تتهرى
بنغرف السجق فى طبق التقديم و نضيف الخضار حواليه و نصب الصوص المتبقى عليه و نجمله بالبقدونس
ممكن يتقدم معاه رز ابيض و سلطه خضرا
كمان بيكون سندوتشات تجنن بالهنا و الشفا

الكنافه بالبلح

الكنافه من الحلويات الشرقيه المميزه قوى و ممكن الواحد ينوع فيها جدا باستخدام انواع مختلفه من الحشوات
البلح الاسود من الاغذيه المفيده قوى و ممكن يتخزن فى الفريزر يعنى يكون موجود طول السنه و نستخدمه كل ما نحب
الكنافه بالبلح الاسود
المطلوب (نص كيلو كنافه - نص كيلو بلح اسود -سكر -سمن او زبد - جوز هند - زبيب حسب الرغبه )
الطريقه يستحسن تكون الكنافه بايته فى الفريزر عشان تكون جامده
بنمسك الكنافه و نفتتها باليد و نقشر البلح و نشيل النوى منه ونقسمه انصاص
نسيح السمن او الزبده و نخلطها بالكنافه كويس عشان الكنافه كلها تتشرب بالسمن
نجهز صينيه مدهونه سمن و نضع فيها نص كميه الكنافه و نضغط عليها جامد عشان تدخل فى بعضها كويس و بعدين نرص البلح على الكنافه و نغطيها كلها و نحط عليه جوز الهند و الزبيب و معلقتين سمن سايح كده يعنى مش كتيير
نكمل باقى خليط الكنافه بحيث تغطى الحشو خالص و برضه نضغط عليها جامد و نرش على الوش ملعقتين سمن برضه و تدخل الفرن و على فكره بتستوى على طول
فى الوقت ده بنكون جهزنا الشراب الى زى ما احنا عارفين كوبايتين سكر على كوب ماء ونص ليمونه و يترك على النار شويه لما يغلى و يتقل شويه صغيرين
لما تخرج الصينيه من الفرن بنقطعها ونسقيها بالشراب و نسيبها تبرد و بعدين تتقدم فى اطباق
ممكن قوى يبقى بدل البلح قطع موز بس بنزود عليه شويه سكر و هكذا و بالهنا و الشفا

شوربه العدس

الشوربه دى برضه مغذيه قوى يعنى طبق منها يعتبر وجبه كامله بالاضافه انها مناسبه قوى للايام البارده لانها بتدفى قوى
شوربه العدس
المطلوب (ربع كيلو عدس -حبتين طماطم -بصلتين متوسطتين -اربع فصوص ثوم- جزرتين )
الطريقه نغسل العدس و نحطه فى الحله و نحط عليه الطماطم و البصل و الثوم و الجزر و نضيف شويه ماء بحيث تغطى الجميع و نحطه على النار و ناخد بالنا عشان العدس ميلزقش
لما الخضار يستوى ناخد المقدار و نضربه فى الخلاط و نصفيه و لو الشوربه سميكه نخفها بشويه ماء
بعد كده بنحمر فصين ثوم مع شويه شعريه صغيرين فى السمن طبعا و بنضيف الشوربه عليهم و نملح المقدار بالملح و الفلفل
نسيبها على النار شويه لحد ما الشعريه تستوى و بعدين نغرفها مع ليمونه خضرا و ان شاء الله تطلع لذيذه
على فكره ممكن قوى نزود اى نوع خضار تانى مع الخليط السابق زى مثلا حبه يطاطس او كوسه كل واحد حسب الطعم اللى بيحيه و بالهنا و الشفا

الكريم كراميل

الكربم كراميل يعتبر حلوى شهيه و مغذيه قوى و خصوصا للاطفال و طريقه عمايله سهله قوى
الكريم كراميل
المقادير (كيلو لبن حليب -4 بيضات كبار - -سكر -فانيليا )
الطريقه اول حاجه نعمل الكراميل و دى حاجه سهله قوى بنحط شويه سكر فى القالب او الصينيه الى هنسوى فيها الكريم و بنحطه على النار لحد ما يسيح السكر و يحمر و نمرره على جوانب القالب و نسيبه يبرد و يجمد و نفس الطريقه فى الصينيه
الخطوه التانيه بنحلى اللبن بالسكر على حسب الرغبه
و بعدين بنضرب البيض مع الفانيليا كويس قوى
ثم نخلط اللبن و البيض المضروب و كده الكريم اصبح جاهز بنصبه فى القوالب اللى فيها الكراميل او فى الصينيه مره واحده
بنرص القوالب فى صينيه فيها ماء لحد نصها بس (حمام ماء) و بندخلها الفرن اما لو كان الكريم كراميل فى الصينيه بنحطها فى صينيه اوسع شويه و فيها شويه ماء برضه و ندخلها الفرن و نخلى بالنا من كميه الماء عشان ميدخلش جوه صينيه الكريم و الهدف من حمام الماء ان الكريم كراميل يكون ناعم و خالى من الفقاقيع و مع ذلك انا اعرف ناس بيدخلوا الصينيه فى الفرن على طول من غير حمام ماء و بيستوى و بيطلع زى الفل على كل الطريقتين صح و كل واحد حر
لما يحمر الوش و الجوانب بيكون استوى خلاص بنطلعه و نسيبه يبرد و بعدين ندخله التلاجه و عند التقديم بنقلب القوالب على طبق و ممكن نجمله بحلقات الموز او لوحده اما لو فى صينيه بنغرف منها فى الاطباق و الحقيقه بيطلع لذيذ قوى و بالهنا و الشفا

التونه

معلبات التونه لذيذه قوى و مفيده و على فكره ممكن تتعمل فى البيت بطريقه سهله قوى
التونه
المطلوب (كيلو و نص سمك تونه (له مواسم بيكون موجود فبها و السمكه شكلها طويل ولوضغطنا على بطنها بيطلع حبر) -2 كوب ماء - نص كوب زيت - نص كوب عصير ليمون -نص كوب خل - ملح -فلفل-كمون -شطه حسب الرغبه )
الطريقه بنغسل السمك و نشيل الراس و نقطعه جزل بعد كده يوضع الماء و الزيت و الليمون و الملح و الفلفل و الكمون (الملح يوضع بكميه بسيطه فقط لانه ممكن نزود بعد كده ساعه الاكل ) و نخلى الخل شويه و نسيبها على نار هادئه لمده ساعتين و نص تقريبا
الخل يضاف لما التونه تقرب تستوى
بنعرف انها استوت لما نلاقى العظم استوى و يتفتت
بعد كده نخلط التونه كويس و هى كده جاهزه للاكل
تحفظ فى التلاجه و نغرف منها حسب الحاجه و نزود عايها شويه زيت او شطه او ملح حسب رغبه كل واحد و بالهنا و الشفا

البيتزا

البيتزا من الاكلات المفضله عند الاطفال و الكبار ايضا لانها ترضى جميع الاذواق لان الاختيار فيها واسع و متعدد و معظم عجائن البيتزا بتتكون من دقيق و ماء و خميره لكن انا عندى عجينه اخرى للبيتزا مكوناتها افضل كتير و مغذيه جدا خصوصا للاطفال
البيتزا
المقادير(اتنين ونص كوب دقيق - نص كوب سمن اوزبد -نص كوب لبن -قطعه خميره بيره صغيره-بيضه -ملعقه صغيره بودر- شويه ملح صغيرين )
اما الحشو فحسب الرغبه ممكن لحم مفرومه او تونه او جمبرى او سوسيس او ماشروم او غيرها
مثلا نختار اللحم المفروم و نختار معاه جبنه موتزاريلا او رومى او شيدر او كلهم معا و معلقتين صلصه و حلقات طماطم و حلقات فلفل اخضر و حلقات زيتون
الطريقه تفكك الخميره فى شويه ماء دافىء و ملعقه سكر
نضرب البيضه مع شويه ملح و فلفل
يوضع السمن السائح على اللبن و يضاف البيض ثم الخميره و يمزج الخليط
نجهز الدقيق ونرش عليه شويه الملح و البودر و نقلبه كويس
بعد كده نضيف الخليط السابق على الدقيق و نعجنه و لما تتكون عجينه لينه نغطيها و نتركها لتخمر
لتجهيز الحشو نعصج اللحم المفروم و نقطع فص ثوم و نحطه مع معلقه سمن على النار و لما يصفر لونه نضيف الصلصه و شويه ماء و نسيبها تغلى و الهدف من الصلصه دى عشان البيتزا تكون طريه مش ناشفه و كمان بتعطيها طعم جميل
بعد حوالى ساعتين بنجد ان العجينه تضاعف حجمها
ندهن صينيه بالسمن و نفرد فيها العجينه و بعدين نحط على الوش اللحم و الصلصه و نرص حلقات الفلفل و الطماطم و الزيتون و نرش الجبنه المبشوره حسب الرغبه و بعدين تدخل فرن حامى
لما تحمر الجوانب و الوش تطلع من الفرن و تتقطع و بالهنا و الشفا

البسبوسه

البسبوسه من الحلويات الشهيره جدا و الجميع بيحبها قوى و لها انواع متعدده بالقشطه او المكسرات او الكريمه و غيرها كتير و الحقيقه لما كنت بجربها فى البيت مكانتش بتنجح قوى لحد ما وصلت لمقدار و طريقه جميله جدا و بتطلع منها البسبوسه زى بتاعه بره و مش مكلفه اوى
البسبوسه
المقادير(نص كيلو دقيق بسبوسه - نص كيس بودر-تلات ارباع كوب سكر- كوب سمن سائح - نص كوب شراب ثقيل او عسل ابيض-نص كوب ماء-نص كوب جوز هند)
للشراب ( 3 اكواب سكر-كوب و نص ماء -عصير ليمونه متوسطه)
الطريقه سهله قوى اولا الشراب بنحط السكر على الماء و عصير الليمونه و نسيبه على النار لما يتقل شويه و كده بيكون الشراب جاهز عشان تتسقى بيه البسبوسه لما تخرج من الفرن
البسبوسه نفسها بقى بنحط السكر على الماء و ندوبه كويس و بعدين نضيف النص كوب شراب او عسل و ندوبه برضه ثم نضع السمن السائح و نخلطهم مع بعض يعنى السوائل كلهم
بعد كده نضيف الدقيق و جوز الهند والبودرو نعجن كويس بتتكون عجينه طريه نوعا نصبها فى صينيه مدهونه سمن و نجمل الوجه باللوز او باى مكسرات لو وجد و لو عايزين نحط على الوش قشطه يبقى بعد ما تستوى و تبرد مش دلوقت و ندخلها الفرن و ناخد بالنا عليها عشان بتستوى على طول و اول ما يتحمر الوش و الجوانب بنخرجها من الفرن و نقطعها و نسقيها بالشراب السابق و ممكن ما تاخدش الكميه كلها عادى نحتفظ بيه فى الثلاجه لمره تانيه و بعدين مستحب نرجع الصينيه الفرن تانى (و هو مطفى) حوالى نص دقيقه بس و بعدين نطلعها و نسيبها تبرد لان و هى ساخنه مش هتطلع خرط و لكن هتتفرفت لكن لما تيرد بيطلع خرط جميله و بالهنا و الشفا

الكشرى المصرى

يعتبر الكشرى من الوجبات الكامله كما انه غنى بكل العناصر الغذائيه لانه مكون من الحبوب الكامله
كمان انا سمعت دكتوره تغذيه بتتكلم فى قناه فضائيه عن اهميه الحبوب الكامله و انها تفرز فى الجسم ما يسمى بهرمون السعاده طبعا ده غير القيمه الغذائيه العاليه و الطاقه( يعنى المفروض الواحد و هو بياكل طبق كشرى يقعد يضحك ههههه)
الكشرى اكيد مشهور قوى و فيه محلات متخصصه فيه كتيير لكن انا بحب اعمله فى البيت لانه انضف و اضمن
الكشرى المصرى
يتكون من ( نص كيلو عدس بجبته -ارز -شعريه -مكرونه صغيره -حمص -صلصه -ثوم -بصل)
الطريقه بنغسل العدس و نحط شويه ماء و نسيبه يتسلق و بنراقبه عشان ما يتهريش يعنى مجرد ما يطرى بيكون خلاص بنصفى الماء و نملحه بالملح و الفلفل و بنقطع بصلتين وبنحمرهم فى الزيت مع شويه ملح و فلفل صغيرين و بعدين ناخد نص كميه البصل المحمر و نضعه على العدس مع الزيت كمان مش البصل بس و بنشوح العدس شويه مع البصل لحد ما ينشف حوالى خمس دقايق و احنا بنقلبه كده العدس اصبح جاهز
فى هذه الاثناء بنعمل رز بشعريه عادى خالص يعنى بنحمر الشعريه و نحطها على الرز و نسويه بالطريقه المعتاده
كمان بنكون مجهزين حله فيها ماء مغلى عشان نسلق المكرونه و المفضل ان يكون حجم المكرونه صغير و لو مفيش كله ينفع بعد سلق المكرونه بنصفيها و نشوحها مع شويه زيت
برضه بنسلق الحمص ونصفيه و نملحه
الصلصه بنجهزها بفرم حوالى اربع فصوص ثوم و نحمرهم فى الزيت ثم نضيف الصلصه و شويه ماء و نملح ملح و فلفل و شطه حسب الرغبه و نسيبها تتسبك شويه
فيه كمان الدقه و هى عباره عن ثوم مفروم مع خل و زيت و ملح و فلفل و كمون و شطه و مخلوطين مع بعض و كل واحده بتضيف النسب حسب رغبتها
على فكره الزيت المستخدم لازم يكون نباتى خفيف زى الذره مثلا لان الكشرى بيتعمل كله بالزيت هو يعنى صحيح بياخد غلبه شويه لكن فى النهايه النتيجه لذيذه
كده الكشرى اصبح جاهز للتقديم كالتالى بنحط طبقه رز و فوقه طبقه مكرونه و عليها طبقه عدس ثم الحمص و بعدين الصلصه و على الوش بنحط شويه من البصل المحمر الى كنا شايلين نصه و بعدين كل واحد بيحط الدقه حسب رغبته و بالهنا و الشفا

البصاره

اكله مصريه تعتبر من فواتح الشهيه و مفيده جدا لانها مليانه بكل العناصر الغذائيه اللى بيحتاجها الجسم
تعتبر من الاكلات الشعبيه المشهوره زى الطعميه و الفول و اقتصاديه فى تكلفتها
البصاره
المطلوب ( نص كيلو فول مدشوش - كسبره خضره-بصلتين كبار -ثوم)
الطريقه سهله نغسل الفول و نحطه فى حله و عليه البصل مقطع و الثوم و الكسبره بعض تقطيعها و نغطيهم بالماء و نحطهم على النار لحد ما يستوى الفول
بعد كده نضرب الخليط فى الخلاط و نصفيه
نحضر ثومه و نقطع بصله صغيره و شويه سمسم و نحمرها فى الزيت و نصب عليه الخليط السابق و نملحه بالملح و الفلفل و الكمون و فى ناس بتحب تحط لها نعناع كله ممكن حسب الرغبه لو كانت البصاره سميكه ممكن نخفها بشويه ماء بس مش كتير لانها المفروض تكون سميكه نوعا
لما يغلى المقدار و يتقل نغرفه فى اطباق
لتجميل الوجه بنحمر بصله مع شويه سمسم و نرشها على وجه كل طبق
لما بتبرد بتكون جمدت (زى المهلبيه كده بتكون سايله و لما بتبرد بتجمد فى الطبق )و بتؤكل بالعيش و طعمها بيكون لذيذ قوى و بالهنا و الشفا

بسكوت نوشادر جميل جدا

البسكوت ده جميل جدا و مجرب و بيطلع مقرمش و خفيف
حلو قوى مع الشاى و مغذى جدا للاطفال
بسكويت النوشادر
المقادير(5 كيلودقيق-باكو بودر-اتنين و نص كيلوسكر بودره-اتنين و نص كيلو زبده -45 بيضه بلدى (لو البيض مش بلدى يعنى كبير ننقص الكميه الى 36 بيضه لانه اكبر من البلدى)-فانيليا-وقيه و نص نوشادر-تلات اربع مج لبن )
الطريقه نضرب الزبد كويس بالمضرب و بعدين نضيف السكر و نضربهم مع بعض قوى
ثم نضرب البيض مع الفانيليا كويس برضه و بعدين نضيفه على الخليط السابق و نضرب الجميع معا
يضاف البودر الى الدقيق و يخلط معه كويس و تفكك النوشادر فى اللبن و توضع على الدقيق و نضيف الخليط السائل (الزبد و السكر و البيض و الفانيليا)و نعجن الجميع جيدا حتى يتكون عجينه لينه و طريه ممكن نضيف شويه زيت صغيريين لتخليص الايدى من العجين
نشكل العجين فى ماكينه البسكوت او بالقمع او باى وسيله متاحه و نرصه فى صوانى مدهونه زيت (الصوانى يجب ان تدهن كويس عشان البسكوت ما يلزقش و نراعى عند الرص اننا نسيب مسافات بين البسكوت و بعضه لانه بيكبر )
بعد كده يدخل الفرن و يجب متابعته باستمرار لانه مبيغبش يعنى بيستوى على طول
المقدار ده بيعمل كميه بسكوت كبيره يعنى الى عايز يجرب الاول ممكن يعمل نص المقدار يعنى يخلى مقدار كل حاجه نص الكميه بس يعنى اتنين و نص كيلو دقيق -نص باكو بودر و هكذا و بالهنا و الشفا

البيتزا السريعه

لما نكون عايزين ناكل حاجه سريعه على العشا و جديده بعمل البيتزا السريعه دى وهى عباره عن ساندوتشات بس بطريقه جديده من اختراعى و عذرا طبعا لو كان حد سبقنى و عملها
البيتزا السريعه
المطلوب عيش بس يكون طرى و سميك شويه يعنى مش رقيق و اى حاجه موجوده فى الثلاجه بجد اى حاجه مثلا جبنه شيدر- جبنه بيضه- جبنه رومى -فلفل اخضر او اى لون- طماطم - زيتون اى لون -تونه - حته لحمه باقيه من الغدا -و غيرها
الطربقه سهله قوى قوى مفيش اصلا طريقه بنجيب العيش ونحط كل حاجه عليه جبن او تونه او غيرها و عليها حلقات رفيعه من الطماطم و حلقات من الفلفل و الزيتون يعنى كل حاجه على بعض فوق العيش مش داخله زى البيتزا يعنى و بعدين ندخلها الفرن تحت الشوايه عشان يتحمر شويه بس و مبيغبش لان كل حاجه مستويه اصلا و بعدين نطلعها ونقطعها مثلثات و بتكون لذيذه قوى و مغريه للاطفال و الكبار كمان و تغيير عن الاكل المعتاد

مكرونه بالخضار

دائما بيكون عندنا بواقى حاجات كتير فى الثلاجه من خضار و غيرها و ممكن قوى نعمل منها اكله سريعه و لذيذه و مفيده فى نفس الوقت و اهم حاجه انها بتعجب الاطفال اللى طول الوقت بيرفضوا اكل الخضار الاكله دى من النوع ده بتعتمد على البواقى من اى نوع من الخضار
المكرونه بالخضار
بتتكون من اى نوع مكرونه و الخضار الموجود فى البيت مثلا (بطاطس -جزر-كوسه-بسله-فلفل اخضر -قرنبيط) و صلصه طماطم و بصله متوسطه و زيتون اسود او اخضر و لو موجود بواقى صدور فراخ او لحم يبقى كويس و لو ما فيش مفيش مشكله لانه بتعتمد على الخضار بس و ممكن تكون وجبه صيامى للاخوه المسيحيين
الطريقه نسلق المكرونه و نخليها على جنب
نبدا فى تجهيز الصوص نقطع الخضار قطع صغيره و نقطع البصله
نحط البصله على النار مع معلقتين سمن او زيت و لما يصفر لونها نحط الخضار عليهاو نقلب لحد ما ياخد لون حلو ودلوقت نضيف الصلصه و شويه ميه و نملح بالملح و الفلفل و الزعتر و الكركم (الكركم بكميه صغيره جدا و بنحطه مش عشان اللون او الطعم ولكن عشان فوائده الطبيه الهامه كمضاد للاكسده و مهم نحطه فى الاكل بكميات صغيره)
نخلى المقدار على النار شويه لحد ما يتسبك و يتقل ونضيف اللحم المقطع ان وجد و ممكن نحط قطع سوسيس حسب الرغبه و طبعا ممكن الاستغناء عنه و نضيف الزيتون المقطع و بعدين نضيف المكرونه و نقلب كويس و ممكن نضيف على الوش شويه جبنه رومى مبشوره و بالهنا و الشفا

الحواوشى

فى الحقيقه كل الناس بتحب الحواوشى (رغيف اللحم) لانه تغيير لطيف عن الاكل التقليدى و فى نفس الوقت مفيد جدا و لذيذ و الاطفال بتحبه
بالاضافه انه سهل جدا جدا فى العمايل و ممكن يكون عشا او غدا او فى حاله الخروج فى فسحه ممكن نعمله و ناخده معانا بيكون لطيف جدا بدل اكل الشارع كمان ممكن ناخده على البلاج
الحواوشى
المطلوب تحضير(كيلو لحم مفروم-بصل كتير حوالى خمس او ست بصلات كبار-توابل(ملح- فلفل- شطه -قرفه-زعتر-جنزبيل-شويه كركم صغيرين على فكره التوابل دى على حسب رغبه كل واحده تشكل زى ما هى عايزه حسب الابداع يعنى)-حوالى 3 حبات طماطم جامده برضه حسب الرغبه يعنى يمكن الاستغناء عنها -كذلك 3حبات فلفل اخضر و الى بيحب الاكل الحار يتوصى بالفلفل الحار)
الطريقه سهله خالص نبشر البصل او نفرمه بس مش ناعم و نقطع الفلفل و الطماطم صغير خالص بس ما نفرمهمش عشان كده الطماطم لازم تكون جامده نخلط كل ده على اللحم مع التوابل و نخلطهم كويس قوى و ممكن نعصر عليهم نص ليمونه بعد كده نحضر العيش و المفروض العيش ميكنش متحمر قوى لاكن ابيض قدر الامكان و ميكنش رقيق لازم ييكون سميك عشان اللحمه هتستوى فيه فلازم يستحمل الفرن و ما يتحرقش
نحشى اللحمه فى العيش و نضغط عليه جامد عشان يكون متماسك و على فكره الكميه دى هتعمل عدد كبيير من الارغفه لو العيش خلص و فاضل لسه لحمه ممكن نشيلها فى الفريزر لحد ما نحتاجها
بعد كده ممكن نرص الارغفه فى صينيه و ندخلها الفرن على طول بس ناخد بالنا منها و نقلبها عشان متتحرقش او نلفها فى ورق المونيوم و ندخلها الفرن لمده بسيطه حسب الفرن لانها بتستوى على طول و ان شاء الله بالصحه و العافيه