Sunday, April 18, 2010

العيش الفلاحى

يا سلام على العيش الفلاحى الرقيق طعمه خطير بس يا خساره مش موجود كتير
كان زمان العيش الفلاحى موجود فى الريف فى كل بيت لكن للأسف دلوقت الفلاحين خلاص ما عدوش بيخبزوا و بيستعملوا العيش العادى إلا القليل طبعا
عندى طريقه العيش و هى سهله على فكره
العيش الفلاحى
المطلوب (كيلو دقيق قمح و ده بيكون اسمر شويه و بيتباع -نصف كيلو دقيق عادى - خميره فوريه او عاديه - ماء للعجن )
الطريقه بنفك الخميره فى شويه ماء و ملعقه سكر
ننخل الدقيق و تقلبه كويس على بعضه و نرش عليه شويه ملح صغيرين
نضيف الخميره
نضيف ماء العجن شويه شويه لحد ما نحصل على عجينه مناسبه لا طريه و لا ناشفه
نرش شويه دقيق على صينيه و نرص عليها العجين على شكل كورصغيره (مثل كوره البينج بونج او اكبر شويه ) و نتركها تخمر بس نغطيها بشاشه عشان الوش يفضل طرى
بعد حوالى ساعتين او اكثر حسب الجو هنلاحظ ان العجين تضاعف حجمه
نبدأتجهيز الخبزنشعل الفرن و لازم يكون حامى
المطلوب ماكينه الخبز و هى نفسها المستخدمه فى صنع المكرونه و بيكون لها رأسين رأس للخبز و رأس للمكرونه
الماكينه دى متوفره فى السوق و مش غاليه ابدا و لها استخدامات كتير
نركب رأس العجين و نحدد درجه السمك المطلوب للرغيف
نفرد كوره العجين على شكل بيضاوى و ندخلها من فوق وندورالماكينه فنحصل على رغيف طويل
لازم يكون الفرن ساخن و حامى و جاهز لدخول الخبز
على طول ندخل الخبز للفرن و نلاحظ انه بيستوى على طول يعنى لا يطول و هكذا حتى نفاذ الكميه
نلف العيش و نحتفظ به فى الفريزر لحين الحاجه




Wednesday, April 14, 2010

مطبخ نجاة : كوكيز بالشيكولاته

كوكيز بالشيكولاته صنف حلو سهل و الكبار و الصغار بيحبوه
الفيديو هايل و شارح كل المعلومات بالتفصيل
تسلم ايدك يا مدام نجاة الله يعطيكى العافيه

الكوكيز بالشيكولاته


Monday, April 5, 2010

البليله

البليله
تعتبر من الأغذيه الهامه جدا و خصوصا للأطفال فى طور النمو لأنها تتكون من حبوب القمح الكامله الازمه لنمو العقل و زياده الذكاء لذلك البليله من الاطعمه المفضله ايام الإمتحانات لزياده إستيعاب الطلبه و التركيز
المطلوب ( ربع كيلو قمح مع كيلو لبن و سكر حسب الرغبه و فانيليا و جوز هند مبشور )
الطريقه فى غايه البساطه
اولا نسلق القمح فى الماء حتى تمام النضج يعنى حبه القمح تنضج و تفشر
ثم نضيف عليها اللبن و السكر و الفانيليا و ممكن اضافه جوز الهند حسب الرغبه
لما تغلى نطفى عليها و تقدم ساخنه او بارده
بالهنا و الشفا

Sunday, April 4, 2010

السمن البلدى

تكمله للمراحل السابقه بعد ما حصلنا على الزبده بنحط عليها شويه ملح و كميه الملح تتوقف على كميه الزبده
نحطها على نار هادئه مع التقليب المستمر حتى لا تحترق من اسفل و طعم السمن يمرر
مع الوقت بنلاحظ تكون طبقه على الوش بنجمعها فى طبق اول بأول و فى النهايه بنلاحظ ان السمن اصبح صافى و تكونت تحت شويه رواسب
بنصفى السمن فى وعاء زجاج ناشف و نحتفظ بيه للاستعمال و يجب ان لا نحفظ السمن فى وعاء بلاستيكى لأنه ضار
الرواسب الباقيه هى ما تسمى( بالمرته )
المرته دى طعمها حلو و ناس كتير بتحبها بنضيفها على الوش الى كنا جمعناه فى الطبق لأنه برضه مرته

الكريمه اللبانى

الكريمه اللبانى هى مرحله ما قبل الزبده
يعنى لما نضرب القشطه زى ما قلت سابقا فى شرح طريقه صنع الزبده
بنلاحظ ان القشطه جمدت و اخذت قوام غليظ و هنا بنوقف الضرب لان فى هذه المرحله تحولت القشطه الى كريمه لبانى
و لو استمر الضرب هتتحول الى زبده
بنحصل على الكريمه و نستخدمها فى اى صنف حسب الرغبه سواء فى تجميل الحلويات او اى صنف

الزبد الفلاحى

كيفيه الحصول على الزبده سهله جدا و طبعا احنا بنتكلم عن الزبده الطبيعى مش المصنعه
يعنى منتجات البان
اولا لا زم نحصل على لبن حليب جاموسى
تانيا بنرقده زى ما عملنا فى الجبنه القريش بالظبط يعنى بنحطه فى وعاء زجاج او فخار او ستانلس المهم لا يكون الومنيوم
و بنغطيه و نضعه فى مكان مظلم لمده تتراوح من يوم الى تلاته حسب حاله الجو لان الصيف غير الشتاء
لما بنكشف عليه و نلاقيه ربط يبقى خلاص بندخله الثلاجه و بعد ساعتين بنأخذ الوش
الى بيكون هو ده الدسم الى فى اللبن ( القشطه )
اللبن الباقى بيكون زبادى او جبنه قريش
القشطه الى طلعت بيكون كميتها قليله يعنى لو 10 كيلو لبن بيعطى حوالى 1 كيلو قشطه لو كان اللبن دسم او جاموسى صافى مش مخلوط
الزبده
بنضرب القشطه فى اتجاه واحد باليد او بالمضرب حتى نلاحظ انفصال الماء و تكون كتله جامده بتكون هيه دى الزبده بناخذها و نحفظها فى الفريزر لحد ما نسيحها سمن
او ممكن نستخدمها كده فى طبخ او الحلويات او على الفطار مع المربى يعنى الاستخدام حسب الحاجه
و كده بنكون حصلنا على زبده طبيعيه جداو بسهوله فى البيت

Thursday, April 1, 2010

مطبخ نجاة : كيكة القهوه

لازم نجرب الكيكه دى لأنها مميزه جدااا
و الفيديو يوضح مراحل اعدادها خطوه خطوه بمنتهى السهوله
من مطبخ مدام نجاة المتألقه دوما
تسلم ايدك يا مدم نجاة

كيكة القهوه

الجزء الأول



الجزء الثانى