المكرونه بالبشاميل

صينيه المكرونه بالبشاميل

المطلوب(نص كيلو مكرونه يفضل اقلام- نص كيلو لحمه مفرومه - 3 او 4 معالق كبيره دقيق - كيلو لبن -بصله متوسطه -جبنه موتزاريلا او بارميجان ان وجد و يمكن الاستغناء عنها)

فى الاول نسلق المكرونه و نسيبها فى جنب
قطعى بصله و حمريها فى السمن وحطى عليها اللحمه و قلبيها و خلى بالك منها احسن تتحرق لو لقيتى اللحمه ممكن تتلسع حطى شويه ميه صغيرين يعنى ربع كوبايه ضيفى الملح و الفلفل وكده اللحمه بقيت متعصجه
البشاميل -حمرى الدقيق فى السمن و بعدين حطى اللبن شويه شويه و ممكن يكون نص الكميه لبن و نصها شوربه كله ينفع حطى شويه ملح و فلفل (عشان البشاميل ميكلكعش حطى السوائل ساخنه و قلبى كويس و حتى لو لقيتى فيه كتل و لا يهمك كل شىء عندنا له حل صفى البشاميل بعد ما يخلص بالمصفه هيطلع زى الفل )
حطى نص البشاميل على المكرونه و قلبى كويس و بعدين ادهنى صينيه و حطى فيها نص المكرونه و بعدين حطى اللحمه ووزعيها كويس و غطى بباقى المكرونه و دلوقتى حطى باقى البشاميل على الوش و حطى الجبنه عليه حسب الرغبه و دخليها الفرن لحد ما يحمر الوش و تستوى
استنى شويه بعد ما تطلع من الفرن عشان تطلع خرط لان و هيه طالعه من الفرن بتكون سايحه و هتتفكك فى الاطباق يعنى اديها فرصه ربع ساعه و بعدين بالهنا و الشفا

المسقعه

اكله مصريه جدااااا و مشهوره و لها اكتر من طريقه

المسقعه

(كيلو بازنجان - نص كيلو طماطم او معلقتين كبار صلصه - نص كيلو لحمه مفرومه او سليمه - بصله متوسطه)

اول حاجه تقشرى البازنجان و تقطعيه حلفقات و تحطيه فى ميه و ملح عشان ما يسمرش وبعدين تطلعيه من الميه و تعصريه بايدك عشان ما يطرطش لانك هتحمريه فى الزيت تحمير خفيف يعنى ياخد لون بس مش عايزينه يستوى و اوعى تتلسعى

ابدئى فى تحضير الصلصه ( الشغل دلوقتى فى نفس الصينيه الى هتدخل الفرن توفيرا للمواعين) قطعى البصل و حمريه فى السمن يعنى يكون لونه اصفر و بعدين بتعصرى الطماطم وتحطيها بالراحه عشان السمنه متولعش و يحصل تدخل من قوات اجنبيه دلوقت ضيفى الملح والفلفل ( اوعى تعملى زى خالتى بمبه و تحطى كيس الملح كله ) و سيبى الصلصه تتسبك على النار شويه بعد عشر دقايق هتلاقى الطماطم تقلت رصى حلقات البازنجان المحمره فى الصلصه و ضيفى اللحمه عليه و زودى الصينيه شويه شوربه اما لو كانت اللحمه مفرومه شوحيها مع بصله و حته سمنه و ضيفيها للصينيه و فى الحاله دى لو ما فيش شوربه حطى شويه ميه كده الصينيه جا هزه للدخول للفرن لكن مافيش مانع من شويه دلع كده على الماشى ممكن تضيفى شويه زبيب و مكسرات لو موجود كمان ممكن تحطى قرن فلفل اخضر مقطع كل ده حسب الرغبه
دلوقتى دخليها الفرن لحد ما تستوى و الوش يحمر بتبقى لذيذه اوى مع رز ابيض او بشعريه او بالعيش و بالهنا و الشفا